ASTEKLIMA Euskadiko Klima eta Energiaren Astea da, Eusko Jaurlaritzak Industria, Trantsizio Energetiko eta Jasangarritasun sailaren bidez, EEE Energiaren Euskal Erakundearekin eta Ihobe ingurumen jarduketarako sozietate publikoarekin lankidetzan bultzatutako ekimena. Helburua argia da: euskal herritarrak mobilizatzea trantsizio energetiko eta aldaketa klimatikoaren erronkaren aurrean, banakako eta taldeko ekintza sustatuz, eredu energetiko iraunkorrago baterantz eta klima-aldaketari hobeto egokitutako eta harekiko erresilienteagoa den gizarte baterantz.
Klima aldaketaren aurkako Nazioarteko Egunaren bueltan, hau da, urriaren 24an, antolatu ohi da urtero, eta ASTEKLIMAK trantsizio energetikoa eta klima-aldaketa publiko guztietara hurbiltzeko jarduerak, tailerrak eta sentsibilizazio ekintzak eskaintzen ditu. ‘Ekintza oro, txikia bada ere, garrantzitsua da’ lelopean, Euskadiko eragile sozial eta ekonomikoen parte-hartze aktiboa sustatzen da.
Eredu energetiko eta klimatiko berri bat helburu
Akordio eta adostasun soziopolitiko zabal baten emaitza gisa, Euskadik asmo handiko lege-esparru bat du, 1/2024 Legea, eta horrek Euskadik klima-aldaketaren erronkaren aurrean duen konpromiso irmoa eta borondatezkoa adierazten du. Alde horretatik, lege honek eragile gisa jokatzen du, eta arintze-politikak bizkortzea ahalbidetuko du, emisioak murriztuz eta trantsizio energetikoa eginez, lurraldea klima-aldaketak izan ditzakeen inpaktuetara egokituz eta bidezko trantsizioa bermatu behar duen ekitatez.
Helburu horiek lortzeko, hauek dira ASTEKLIMAk egiten dituen ekarpen zuzenak:
- Herritarren sentsibilizazioa: klima-aldaketaren eraginei eta eskura dauden baliabideei buruzko ezagutza sustatuz.
- Tokiko ekintzak bultzatzea: udalerri eta eskualdeei legearekin bat datozen ekimenak ezartzen lagunduz.
- Hezkuntza: gazteak eta ikastetxeak jasangarritasunaren kultura indartzen duten jardueretan inplikatuz.
- Jardunbide egokiak aintzatestea: Euskadin trantsizio energetikoa eta klimatikoa bizkortzen duten proiektu eredugarriak sarituta.
ASTEKLIMAren bidez, informazioa emateaz gain, Euskadik gizarte aktibatzen du aldaketaren protagonista izan dadin. Konpromiso klimatikoa ez delako soilik instituzionala: kolektiboa, egunerokoa eta premiazkoa baizik.
