Alkateen Ituna mugimenduari lotutako Bulegoak, Ihobe sozietate publikoaren lankidetzarekin, jardunaldi tekniko bat antolatu du klima-aldaketari egokitzeko udal planei buruz. Udal esparruan egokitzeko planei lotuta dauden jardunbide egokiak aurkeztuko dira bertan, eta mota horretako politikak ezartzen ari diren hirien esperientzia azalduko da, baita lorpenak eta zailtasunak aztertu ere.
Jardunaldian, bestalde, Europako Batzordearen Klimaren Zuzendaritza Nagusiko ordezkari batek Erkidegoaren etorkizuneko politika azalduko du; horrez gain, Euskadin eta Nafarroan, udal mailan dauden arriskuak eta ahultasunak aztertzeko baliabideak zein diren ere azalduko da, horiei esker aipatu politika ezartzeko neurriak hartuko baitira.
Klima eta Energiarako Alkateen Itunean tokiko milaka gobernu daude batuta, eta denek erabaki dute EBeko klimari eta energiari lotutako helburuak ezartzea. 2008an eratu zen Alkateen Itun hori Europan, EBeko klimari eta energiari lotutako helburuak ezartzeko eta betetzeko konpromisoa hartu zuten tokiko gobernuak batzeko asmoz.
Gaur egun, tokiko eta eskualdeko 10.000 agintaritzatik gora batzen dira bertan, eta denek aprobetxatzen dituzte hainbat eragile tartean dituen mugimendu horren alderdi onak. Horrez gain, Itunak berariaz sortutako bulegoen laguntza teknikoa eta metodologikoa du.
