Hegaztiekin egiten diren jardueren artean deigarrienetako bat eraztun zientifikoak jartzea da. Hegaztiak sare bertikalen bidez harrapatzen dira. Sare horiek egunsentian leku egokietan jartzen dira eta hegaztiei ez diete kalterik egiten. Hegaztiak eguneko lehen lau orduetan izaten dira aktiboen, eta orduantxe aprobetxatzen ditugu harrapatzeko, beren datu biometrikoak lortzeko, eraztunak jartzeko eta askatzeko.

Jarduera zientifiko hori oso garrantzitsua da, klima-aldaketak hegaztien portaeran eragiten dituen aldaketei buruzko datuak lortzeko.