Gernika-Lumoko Udala, Global Factor aholkularitza-enpresarekin lankidetzan, Klima Aldaketa Arintzeko eta horretara Egokitzeko Plan Integratua (PIMACC) prestatzen ari da, 2050era begira. Udalak parte hartzeko prozesua irekiko du irailaren 29an egingo den partaidetza-saioan. Saio horri esker, herritarrek eta kolektiboek egindako diagnostikoa ezagutu eta PIMACC planean sartuko diren ekintzak zehazteko proposamenak egin ahal izango dituzte.
Gernika-Lumoko berotegi-efektuko gasen emisio-maila eta udalerriak izango lituzkeen klima-arriskuak aztertzen dituen diagnostikoa osatu ondoren, herritarrek parte hartzeko prozesua ireki dute orain, egindako diagnostikoa ezagutarazteko eta herritarrek gai horri buruz duten ikuspegia eta egin ditzaketen ekarpenak jasotzeko. Horrela, udalerriaren errealitatera egokitutako plan bat garatu nahi da, Gernika-Lumoko eragile sozial eta ekonomikoen ikuspegia barne hartzen duena.
Parte hartzeko saioan, egindako diagnostikoaren ondorio nagusiak aurkeztuko dira, udalerriaren abiapuntua ezagutarazteko. Jarraian, egoera horri buruzko iritzia emateko eta jarduteko proposamenak egiteko tarte bat utziko da. Ideia-jasa horren ondoren, proiektuaren hurrengo urratsak azalduko dira.
Partaidetza-saio presentziala Kultur Etxean egingo da irailaren 29an, 17:30etik 20:00etara. Informazio teknikoa jasotzeko eta saioan izena emateko aukera, honako web guneko idazkia beteta egin ahal izango da.
Partaidetza-saioak honako agenda hau izango du:
- Iraupena Jarduera
- 17:30 – 17:40 Ongietorria, esker onak eta saioaren aurkezpena
- 17:40 – 18:10 Gernika-Lumoko klima-aldaketaren diagnostikoaren aurkezpena
- 18:10 – 18:20 Talde-dinamikaren aurkezpena
- 18:20 – 19:20 Talde-lana: Brainstorming-ekarpenak
- 19:20 – 19:40 Bateratze-lana
- 19:20 – 19:50 Hurrengo urratsak
- 19:50 – 20:00 Itxiera eta eskerrak
Gernika-Lumo munduko klima-helburuekin bat eginda
Udalak urteak daramatza jasangarritasunaren arloan lanean 2030 Agendaren bidez. 2019an klima-larrialdia adierazi zuen, eta klima-ekintzarako politikekiko konpromisoa erakutsi zuen. Proiektu horren bidez, udalak udalerriaren diagnostikoan sakondu nahi du, eta zenbait ildo estrategiko eta funtsezko ekintza ezarri nahi ditu, udalerriak klima-aldaketari egiten dion ekarpena murrizteko eta klima-aldaketaren erresilientzia handitzeko. Testuinguru horretan, azpimarratu behar da Udala LIFE IP Urban Klima proiektuaren parte dela, Euskadin datozen urteetarako klima-ekintzarako proiekturik handienetako bat, eta horren bidez lan egin ahal izango duela bere lurraldea klima-aldaketara egokitzeko.
